הונדערטער טויזענטער פראטעסטירער פארפלייצן די האנג קאנג’ער גאסן שוין אין די 11’טע וואך אין א ציה צו פראטעסטירן פאר זייער פרייהייט אין די האלב-פרייע כינעזער טעריטאריע, טראץ די ווארענונגען פון כינע אז ס’זאל זיך זאפארט אפשטעלן. אפילו די שווערע כינעזער מיליטערישע אנוועזנהייט ביים גרעניץ פון האנג קאנג האט נישט באוויזן זיי צו דערשרעקןן.
לויט די פראטעסט ארגאניזירער האבן זיך אזויפיל ווי 1.7 מענטשן באטייליגט אין די פראטעסטן, און די ציפערן וואקסט יעדן טאג. אין די זעלבע צייט טענה’ט די רעגירונג אז ניטאמאל האלב פון די ציפער זענען ארויסגעקומען פראטעסטירן, אבער די בילדער וואס קומען ארויס צייגט ענדערש אז די פראטעסט ארגאניזירער זענען גערעכט.
סיי ווי אזוי איז עס זייער א גרויסע נומער פון פראטעסטירער, און די פאקט אז אזא גרויסע צאל מענטשן פראטעסטירן און עס פאסירט נישט קיין ערנסטע געשלעגן אדער ברוטאלע צוזאמענשטויסן, צייגט אז די שטאטישע איינוואוינער געבן זייער שטיצע פאר די פראטעסטן, און קיין ציווילע וועלן זיך נישט אננעמען פאר די רעגירונג וואס שטייט פארלוירן און קען נישט קאנטראלירן די פארשעמנדע מצב.
די פראטעסטירער האבן איינמאל זיך יא צעפירט די הענט אין די אינטערנאציאנאלע לופטפעלד פאר צוויי טעג אין א ציה, וואס האט געברענגט צו א פאראליזירונג אין לופטפעלד. דורכאויס דעם איבערקערעניש האבן די פראטעסטירער מיאוס צעשלאגן ציווילע בירגער פארדעכטנדיג אז דאס זענען כינעזער שפיאנען, און די פראטעסטירער האבן זיך שפעטער אנטשולדיגט דערויף. די כינעזער רעגירונג האט זיך צוגעכאפט דערצו און באצייכנט די פאל אלס “אומדערהערטע טעראריסטישע אקטן”…
די פראטעסט וואס איז פארגעקומען די וואך איז געווען אין די וויקטאריע פארק אין שטאט, וואו מ’האט שפאצירט מיט גרויסע שירעמעס צוליב די גרויסע רעגן, ווען דער שירעם איז פארוואנדלט געווארן שוין א צייט צוריק אלס א סימבאל פון די פראטעסטן. די פאליציי האט געגעבן א פערמיט צו פראטעסטירן אין פארק, אבער נישט צו אפרעכטן א מארש נאכדעם, א זאך וואס די פראטעסטירער האבן איגנארירט, און אפגעהאלטן א גרויסע מארש נאכדעם וואס ס’איז שוין נישט געווען קיין פלאץ אין פארק.
די וועלט שטייט געשפאנט מיט אן איינגעהאלטענעם אטעם צו זען ווי ברוטאל עס וועט זיין כינע’ס רעאקציע צו דעם, נאכדעם וואס אלע פראטעסטן קומען צוליב א געזעץ וואס מ’האט דורכגעפירט צו ליפערן פארברעכער קיין כינע, א זאך וואס האט זיך אנגעשטויסן אין א שרעקליכע ווידערשטאנד מצד די בירגער, און כאטש וואס די געזעץ איז שוין אנולירט געווארן, איז אבער דער שטורעם דערווייל נישט איינגעשטילט, ס’ווערט נאר ערגער און ערגער.
